Prins Stefan I vaan Groet Mestreech heet zaoterdagmiddag, zoe es geer oetgebreid op RTV Maastricht höb kinne zien, bijnao met späöls gemaak de mach euvergenome vaan die vaan eus. Dat gebäörde oonder de ouge vaan de Haagse excellenties minister Dilan Yesilgöz van Veiligheid en Justitie en staatssecretaris en de Mestreechse Vivianne Heijnen van Infrastructuur en Waterstaat; en Braobänder in Limburgse deens Emile Roemer koos es Gouverneur ouch niks mie oetriechte.

Wie e stel evermennekes zaote de zeve wethwawwers d’r bij en loerde ziech de ouge oet toen hunne börregemeister - g’r wet wel Annemarie Penn te Strake - ziech in slaop leet susse door De Tempeleers oeteriteitetoeker Georges van Zeijl; vakkundig plaveide heer dee weeg glad veur d’n Hoegen Hoeglöstegheid. Zoewie dee wel mie begrip es ‘t op kanse aon kump maakde heer vaan dee veurzat e inköpperke. In recordtied - noets ieder lökde ‘t ‘nne prins die vaan eus veur vief oor nog oet ‘t stadhoes te jaoge.

Wat euveriges ouch nog noets ‘ne Prins gelök is en Stefan I ziech ouch op z’ne palmares kin laote bijsjrieve: maestro André Rieu zaot vlak achter de excellenties met te genete vaan de Machseuverdrach. Noe zal die vaan eus - jao, Annemarie Penn wel zegke: “Dat heb ik gerangeerd”, mer zoe wie toeker Georges van Zeijl vemiddag wel dekser zag, dao in ‘t stadhoes weurt zoeväöl gezag, en zeker binnen ‘t college vaan B&W.
D’n nuije toeker heet euveriges bij zien ierste optreije geliek ‘ne evergreen de neergezat. Zien Mestreechter versie vaan de Pianomaan waors wat betröf teks en meziek, neet op de letste plaots door oondersteuning vaan dat oonvolpreze Mestreechter Vastelaovends Orkes, geliek good veur ‘ne evergreen. Es Georges van Zeijl oets zien bef aon de
spreekwoordelijke wilge geit haange, kin heer altied nog ‘n Pianobar beginne….. Kaffee d’n Toeker beveurbeeld.

En de Machseuverdrach is geine Machseuverdrach este dao geine cortège aon veuraof get en nog väöl mie vaan importantie: este Hoegen Hoeglöstegheid zien ieuwige leefde aon ‘t Mooswief betuig. Ouch vendaog weer waors dat momint - este prins oonder ‘t sjoenste stadsvolksleed vaan de wereld häör iers puunt en daan ‘nne salut bringk - um ‘t neet druug te hawwe. Zeker neet es um häöm en häör heen de waopedragers vaan Garderizzjemint De
Kachelpiepers ‘n ierecordon vörme.

Umtot dat allemaol eedere rechtgeaarde Vastelaovendsvierder zoe aon zien prei get zeet geer bij dit artikel ‘n rits aon sfeerbeelde gemaak door Laurens Bouvrie. Dat deit heer ouch veur uuch op de site vaan RTV Maastricht tijdens de drei Zwoer Daog. Vastelaovend Same!