Prins Etienne d'n Ierste bij CV De Braniemeekers

De nuie Hoeglöstigheid vaan CV de Braniemeekers, dee euver 't Braniemeekersriek vaan Lummel & Nazareth zal goon regere is prins Etienne d'n le.

In de börgelekke stand vaan Mestreech steit heer ingesjreve es Etienne, Christiaan, Annette Notten. Heer zaog zien ierste levensleech op 2 jannewarie 1973 in Mestreech. 

In zien jäögjaore had heer versjèllende hobbies: voetballe bij RKVCL, meziek make mèt d'n drumband en reserve tamboermaître vaan Fanfare Juliana én pleetsjes dreije es DJ en bestuurslid bij 't JOW in Lummel. 

Heer begós zien lierzame leve op de kaksjaol bij juffrouw Hameleers en de bewaorsjaol St. Lidwina in Lummel. Daornao góng heer studere aon de MAVO Wyck, St. Maartenscollege en oeteindelek nao de Laboratoriumsjaol in Zitterd. Nao zien studie is heer goon wèrke bij Crossfield es laborant. Nao 14 jaor heet heer d'n euverstap gemaak nao Nalco Netherlands BV boe heer noe alweer 13 jaor wèrk. Iers es Application Engineer en sinds 2021 es Managed Operations Technician. 

In 2017 lierde heer zien vruiwke Ramona Roumans kinne, door tot hun dochters bijein in de klas zaote, en toen is de voonk veurgood euvergeslage. 't Gezin besteit oet twie dochters, Zoë vaan 20 en Kiomi vaan 20 jaor, en ze höbbe twie Chihuahua's die lustere nao de naome Tito en Lola en 'ne pappegej Jacko. Same woene zie in 't Prinselek pelies aon de Kestiel Cortenbachlaan in Nazareth. 

In ziene vrije tied heet heer nogal get dinger boe heer ziech mèt bezeg hèlt. Nao tot heer vreuger es jäögtrainer bij RKVCL en IBC'03 gewèrk had, góng heer daonao wijer bij Geusselt Sport es damestrainer. Noe op 't momint is heer teammanager vaan de selectie vaan Geusselt Sport. Ouch is heer groete leefhöbber vaan de Formule 1. In Mestreech en umstreke is heer bekint es DJ Etiënne en op die meneer weure de nudege fieskes door häöm opgeluustert mèt sjieke sfeer en meziek. 

Es Mestreechteneer is heer sjus wie us allemaol opgegreujd mèt de Mestreechter Vastelaovend. 't Begós in Lummel wie heer es koejong perbeerde um ziech sjoen te verklije en zoe oetgerope te kinne weure es jäögprins vaan de Braniemeekers. Jaomer genóg is 'm dat noets gelök. Wel is heer bij de raod vaan 11 gegaange wie de jäögraod woort opgeriech in 1984. In 1994, in 't jaor vaan Prins Crittien Borgions, is heer lid gewees vaan de groete raod boedoor heer ouch al 't bekinde vuuske vaan Arie Muijtjens verdeend heet en dat mèt groete ier bewaort. Wie de Kaanjeleers (vaan de famfaar) in 1995 nui lui zeukde, is heer euvergestap en in 1999 woort heer dao zelfs oetgerope es Hoeglöstegheid vaan CV de Kaanjeleers.