Höb g’r ze ouch gezeen? D’n eine allein, de aander verkierend in e grupke. Ein die meziek maak of eine dee veural väöl zingk. Ze zien d’r weer in alle maote, vaan alle generaties en wieke vaan de stad en oongetwiefeld ouch vaan dao boete. V’r höbbe ‘t oeteraard euver de Köp vaan de Mestreechter Vastelaovend.

Stadsfotograaf Laurens Bouvrie krijg vaan al die individue die de Mestreechter Vastelaovend gezamelek tot zoe uniek fies make sjevraoje. In dees ripportaasj de ierste Ode aon de Köp!

Veur ‘ne fotograaf is ‘t altied weer lestig um bij ‘n artikel boe mie foto’s ‘n rol in speule de hooffoto oet te zeuke. Bij ‘n artikel met Vastelaovendsköp in de hoofrol is dat hielemaol e gedoons. Weurt e vruike of e menneke? Iemes dao tösse in? Sjiek, vettig, aajd, joonk? “Wat veur ‘n käöste ouch maaks, ‘t blijf altied ‘ne persoenleke veurkäör”, zeet Laurens Bouvrie op die vraog vaan de redactie vaan RTV Maastricht.

Mer zoe noe en daan hoof zelfs ‘nne fotograaf ziech neet lang te bedinke. Daan wet heer eigelek al vaan ‘t momint tot de foto is gemaak, dat dee zien pleetsje vaan d’n daag weurt.

‘t Waors notabene veur ‘t Prinselek Palies boe Laurens Bouvrie zaog tot umhoeg loere belangriek is; este tenminste af en tow ouch mer ‘ns get lieger loers. Dao leep heer, ‘ne kroekestöpke nog; mer in al zien späölsheid en spontaniteit ‘ne gamin um op te vrete. Tenminste zoe zaog euze stadsfotograaf dat. Genoog geweldige köp dit jaor, mer ‘t köpke vaan dee mini-Kachelpieper is mie daan allein e sjoen en sjiek portretsje. ‘t Zeet ouch hiel väöl euver wie de Mestreechse Vastelaovendvieder de jäög vaan kleins aof aon liet preuve wat carnaval en al die köp in en veur Mestreech beteikent.