V’r loupe inmiddels behuurlik achter op ‘t sjema. ‘t Kin ouch bijnao neet aanders. ‘t Ei memorabel momint is nog gaonde es ‘t aander alweer begint. Stadsfotograaf Laurens Bouvrie piep en kraak vaan alle kante, toch blijf heer uuch op de huugte hawwe in woord en beeld vaan de Mestreechter Vastelaovend. Tot d’r get Mestreechter keteerkes vertraging inzitte, dat kint geer ‘m nao de vastelaovend wel op ein vaan zie’n boetekentoere inpepere. 

De lesten daag vaan de Vastelaovend beginne v’r hei bij RTV Maastricht met veer memorabel mominte oet d’n hook vaan eus Zate Hermeniekes.

Zoe kwaome v’r dinsdag die vaan Tête de Veau tege. Wee kin ‘t gezelsjap neet? Nein, ech neet allein umtot de Knievel Bovens ein vaan de lede is. Dat gezelsjap späölt vals es ‘t kin en sjoen es ‘t moot. En dat al 4 x 11 jaor! Toch e momint um Tête de Veau veur de ieuwigheid vas te legke. 

Dees daog is ‘t zjus elf jaor (dus 1 x 11) tot Erwin en Nicole vaan Segura! Escola de Samba in Café De Zwaan op vastelaovendsdinsdag in ‘t houwelek trooje. Vendaog woorte zie in Café Charlemagne door niemes aanders daan euze Hoegen Hoeglöstegheid Prins Stefan in de sjienwerpers gezat. Wat ‘n leefde veur elkaar, veur de Vastelaovend en veur dat manjefieke gezelsjap boe zie al die jaore al deil vaan oetmake waors te zien dao in De Boterkop.

De dinsdag waors al vreug gelaoje met emoties. Dat had alles te make met de oetreiking vaan ‘t wisselkleinood Hermenieke vaan Verdeenste 2023. Dao bij dat manjefieke hermeniekes/vastelaovends monumint vaan Han van de Wetering waors ‘t roond de middag geliek kriete. Ummers ‘t waors ZH Um te Jenke die in bijzien vaan al die aander hermeniekes door bedinker vaan dit spektakel, Armand Peereboom, de ier krege towgerope.

Twie Zate Hermenieks sjitterde trouwes door neet present te zien. Nota bene De Aw, jao die oet 1959 waors nörreges te zien. Dat gold ouch veur, toch ouch gei misselik gezelsjap, Sjele Zeik.

Zoe es me dat zoe sjiek zeet: met permissie hadde ze ‘t onbijt op ‘t OLV Plein en de oetreiking vaan Verdeenste links laote ligke. Zoe wie eedere rechgeaarde Mestreechteneer inmiddels wet; De Aw kamp met get personele probleme. Met naome ‘t aontal bloozers is te weinig um allein d’r op oet te trekke. Dat helt toch ouch geine mins vol: 64 jaor bloze.

Mer good, in geval vaan noed is d’r nog altied de B.V. Sjele Zeik. Die höbbe neet allein ‘n arsenaal aon topmuzikante in hoes. E groet deil heet ouch nog ‘ns bezei vaan Mestreechter tradities en e muzikaal hart vaan goud. Toen die Zeikers loch krege vaan ‘t feit tot Zate Hermenie 1959 ‘nne sabatical wou goon hawwe, zagte die Euver Mien Doed Lief. Nou dat lieverde vendaog get geweldigs op: Nao ‘e riechtig konzèr veur Hallo Mestreech trokke de twie hermeniekes met die sjitterende veendels veurop gezamelek nao Jour de Fète oppe Merret. Dao späölde Die Twie neet de sterre vaan d’n hiemel, mer wel de wolke weg. De Vastelaovendsdinsdag kreeg wat ‘t verdeende: en de aonwezigheid vaan De Aw en ‘t Zönneke!