Markies Raymond d'n twiede regeert euver 't Wittevroweveld

Zaoterdag 21 jannewarie is Raymond Stassen oetgerope es 51e (d’n twiede) vaan CV De Drommedarisse oet ‘t Wittevroweveld.

Zien Markiezelijk pelies steit op ‘t Habsburgerplein 33 en heer is gebore op 12 miert 1980 in Mestreech. Heer is de zoon vaan John Stassen en Nettie Stassen zaoleger en ‘t jonger breurke vaan Patricia.

Markies Raymond woent same mét zien vröwke Tanja  en heer heet twie kinder: eine zoon Dilano en ein dochter Alyssa. Ouch heet heer hoesbieskes: 2 Franse bulldogs Luna en Kiki en eine valkparkiet Mexx.

Door e zwoer operatie deid heer noe 3 daog wérke es fietsemeker bij Bike Repair op de Fraankestraot. Ziene vrije tied verdeid heer door bezig te zien bij Geusselt Sport, volgens zien vröwke zien twiede thoes. Heer späölt daor 35+ voetbal 7 tegen 7.

Ouch geit heer gere nao MVV mét ziene zoon Dilano en kammeraod Björn, boe bij zie ouch gere nao de F1 kieke en in ’t bezunder Max Verstappen Ouch is heer geer oonderein mét vrun veur e gezellig äövendsje.