Op d’n hook vaan Pieterstraot en Begijnestrao steit e köppelke tege de moer vaan Café Sjiek aon. Bij hunzelf is ‘t sjoen wel de venaof. ‘t Is dudelik tot ze geere wile goon slaope. Dat kinste um keteer nao zes ‘s mörreges ‘n gooj gedachte vinne. Eus helde vaan de Stadsreiniging Mestreech zien alweer e paar oor op. Get weijer, bij de Koojstraot en Slevrouweplein blooze ze ziech ‘ne weeg nao de Pieterstraot en de Steine Brögk. Stadsfotograaf Laurens Bouvrie heet zoe zien eige tradities. Eine daovaan is zien jaorlekse ode aon al die gaste die midde in nach opstoon zoetot veer e paar oor later weer ‘ne propele vastelaovend kinne viere.

Roontelum de hotspots vaan de Mestreechter Vastelaovend is ‘t op dee vreuge mörrege in eus aajd Mestreech alles behalve Sjiek en Sjoen. Dat is niks nuits; sinds de straotcarnaval ech veur vol straote en pleine ging zörrege is dat ‘t geval. En wee noe reup ‘Jao, met die plastic bekers is ‘t allein mer erreger gewore’ moot toch iers mer ‘ns met de jonges en meitskes vaan Stadsreiniging spreke. Welliech is ‘t visueel ‘n groeter zwijnerei. Mer zoonder glaas is ‘t veiliger werke, minder sjaoj en geit ‘t opruime stökke sneller.

‘t Velt eeder jaor weer op met wieväöl good gemood de stad weurt zuuver gemaak. Terwijl de jonges vaan brouwerije de beertanks vaan de kaffees zien aon ‘t bijvölle, zuuste euveral opruimteams hun dingk doen. Weliswoer liek ‘t tot ze mer get doen, mer niks is minder woer. Met belump weurt de binnestad meter per meter spic & span gemaak. En wat dao eeder jaor weer bezunder aon is: dat gebäört met väöl plezeer.

Op d’n hook Koojstraot en Cortenstraot liek ‘t of Sil de Strandjutter op zeuk is nao get weerdevols tösse alle rotzooi in. Mer in plaots vaan ‘ne metaaldetector deit zie dat met ‘ne laptop. Al snel weurt dudelek tot M. in de late eurkes häör tillefeuntsje zeuk. Op de laptop flikkert e symboolke op en neer dat de locatie aongief vaan dat nuij liechaamsdeil vaan de moderne mins. De plastic woestijn is te groet um dat dingk terögk te vinde.

In de kaffees weurt euveriges ouch al flink gewerk. De pootspleug höbbe ‘t lepke ouch neet al te deur.

Die vaan de Platielstraot höbbe mazzel. Dat is zoe oongeveer de ierste straot die door de Stadsreiniging weer gefatsoeneerd is.

Oppe Vriethof stik e meitske euver met e rollerköfferke. Is ‘t ein vaan Air Ordinair? Zoe te zien neet. Ze heet geine kauwgum in häöre moond. Me vergit ‘t haos, mer dao zien zat lui die tijdes dees drei daog e gewoen leve lije.

Dat goon euze Drekmaan goonsdag ouch doen. Tenminste, ze goon neet euze rotzooi opruime. Vaanaof Asselegoonsdag goon zie e weekske stake. Zie doen geere hun pliech veur de stad Mestreech. Mer ouch zie wille geere aon ‘t ind vaan de maon get kezjem euver hawwe. Al die complemintsjes zien aordig, mer ouch eine vaan Stadsreiniging köp dao gei broed vaan.