Mestreech sliep nog. Gans Mestreech? Nein. In de vreugte vaan de zoondagmörrege vaan de ierste daag vaan de Vastelaovend is - wat aanders - ‘t Garderizzjemint de Kachelpiepers al gereid um te doen wat ‘t moot doen. Um ach oor is ‘t op ‘ne geheim historische locatie in Hier ‘n drökte vaan belang. ‘t Meziekkorps en de geweerdragers zien intensief bezig met ‘t versterke vaan de inwendige mins. Wee de bewakers vaan d’n Hoegen Hoeglöstegheid en zien prinses en de Mestreechter Vastelaovend e bitsje kin wet wat dat beteikent. Spek met ei, vlaoj, hei en dao ‘n Eelske en get mie hei en dao e fleske geerstenaat. ‘t Is al snel dudelek dat ‘t Mestreechs elitekorps in bloodvörm is.

Dat wet Prins Stefan I ouch. Neet allein umtot heer zien Rizzjemint al dik drei weke heet metgemaak. In alle vreugte kwam heer zoondagmörrege in cognito en met zienen hoond eve zien korps mood in te spreke veur de drei zwoer daog.
E paar eurkes later - gruuts in zien Bourgondische outfit - inspecteert heer veur zien pelies De Kachelpiepers. Aon ‘t massaal opgekoume publiek en oeteraard alle naobers liet heer wete tot die inspectie show is. “Höb geer gezeen en gehuurd wie ze hei nao tow kwaome. Daan wetste toch totste in gooj han bis.”

Veur tot de Kachelpiepers arrivere heet de prins, met zien prinses en kinder al meinige reijaloet geloupe. Frans Theunisz - intensief gevolg door ‘ne cameraploog vaan L1 - Duo X-Elle, de Zes Köp - of zien ‘t ‘rs Vijf of gewoen de Köp - make vaan ‘t stökske Hier boe ‘t Prinselek Pelies ligk eine groete kaffee. Daan volge inkele mominte die veur eedere prins ieuwigheidsweerde heet. ‘t Heise vaan de Prinseleke Drappeau; de speeches vaan de preses’ vaan De Tempeleers en Kachelpiepers en ‘t fouragere vaan de tönnekes vaan de Merketentsters. Zjus wie Asterix nump Prins Stefan ‘ne gooje slok oet ein vaan die veetsjes. Heer geit zoe metein met ‘t geveul oonsterfelek te zien nao zien en eus Mooswief. En wat heer dink is ouch zoe. Oondanks de feiseleke fiezelrege is ‘t Vastelaovend Vierend Volk vaan Mestreech al vreug en massaal nao ‘t Vriethof getrokke.

Naotot Prins Stefan I dao d’n ierste vaan elf kanonsjeut los, is ‘t momint dao dat heer - same met zien kinder - ‘t Mooswief hoeg bove eus oet liet stijge. Oonder de hiemelse meziek vaan Fons en Guus Olterdisse zingk eederein oet vol boors Hoera Vivat! Mestreech. D’r is geine weeg terögk, De Mestreechter Vastelaovend 2023 is hielemaol los. En de Köp, al die individue die de Mestreechter Vastelaovend make, viere boeste ouch kumps ‘t sjoenste fies
vaan al.

Stadsfotograaf Laurens Bouvrie liet uuch hei al get sfeer preuve. Maondag en dinsdag pak heer same met eindredacteur Stephan van Appeven met nog väöl miejer foto’s good oet. Dat blijf heer doen tot ‘t Mooswief umlieg kump en Prins Stefan ziene scepter en prinseleke möts aofgief aan de preses vaan de Tempeleers. Mer dat doort nog eve.