RTV Maastricht

111 Odes in kleur en zwartwit aon de Mestreechter Vastelaovend 2023

Höb geer zoondagmörrege dat manjefieke beriech vaan de inmiddels in röste ziende Hoegen Hoeglöstegheid 2023, Prins Stefan I, geleze? Nog eine kier deeg heer op social media ‘t Vastelaovend Vierend Volk en al die lui die - eeder op eige wijs - dee Mestreechter carnaval meugelik make bedaanke. Dat doog heer met egards vaan ‘t kaliber lek, vinger lek doum.

Stadsfotograaf Laurens Bouvrie zaog dee groete merci vaan inmiddels weer Stefan Gybels zjus toen heer gereid waors met ‘t make vaan nog eine kier ‘n selectie Vastelaovendfoto’s 2023.

Zjus ‘n week geleije woort Mestreech veur drei daog die stad ‘Zoe sjoen aon de Maos es de Boonte Störrem raos’.

Euze fotograaf - inmiddels ‘ne kilo eelt op de hakke zwoerder - heet uuch zoe good es meugelik op de huugte gehawwe vaan wat heer zoe al zaog en hoort.

De aofgeloupe daog zuimerde heer nog ‘ns 111 foto’s biejein boe heer vaan dach: die plaots iech es nog eine kier ‘n ode aon de Mestreechter Vastelaovend, De Köp, de bewakers vaan al dat sjoens De Kachelpiepers en oeteraard dee ‘zoe’ne gooje höbbe veer nog noets gehad’ Hoegen Hoeglöstegheid, Prins Stefan I.

Geneet nog ‘ns 111 kier nao vaan Vastelaovend 2023. ‘n Deil dao vaan in zwartwit. Die maag geer zellevers inkleure.